छोरी

तिम्रो आगमनले नै मेरो काख भरियो।
मैले कसरी व्यक्त गरूँ
आमा हुनुको पहिलो अनुभूति
त्यो अनुभूति तिमीले नै गरायौ।
हाम्रो मायाको सुन्दर सृष्टि हौ तिमी,
मेरो मुटु र बाबाको प्रतिबिम्ब हौ।
बिहानीपखको पहिलो किरणझैँ
र आकाशको ताराजस्तै
शीतल छायाँ हौ तिमी।
छोरी रुँदा मेरो मन रुन्छ,
र तिम्रो मिठो मुस्कान देख्दा
खुसीले गद्गद् हुन्छु म।
कस्तो रहेछ प्रकृतिको “आमा” भन्ने सृष्टि
त्यसको अनुभूति तिमीले नै गरायौ।
अर्ध थिएँ म तिमीलाई पाउनुअघि,
पूर्ण त तिमीलाई पाएपछि भएँ।
घरमा छोरी हुनु
भाग्यमात्र होइन, सौभाग्य रहेछ
तिम्रो आगमनले नै यो अनुभूति गरायौ।
हाम्रो मायाको सुन्दर सृष्टि छोरी,
मेरो मुटु र बाबाको प्रतिबिम्ब हौ तिमी।